مــــــــــــــــــــــازالــــــــــــــــــنـــــــــــــــا واقــــــــــفـــــــــــيــــــــــــــن..

مــــــــــــــــــــــازالــــــــــــــــــنـــــــــــــــا واقــــــــــفـــــــــــيــــــــــــــن..
 

احنا هوما الجزايريين أبناء المليون و نصف مليون شهيد علينا شاهدين..قرن ونص استدمار و ثورة يحكي بيها الكبار للصغار حرب و دمار و نار و اقهرنا الحلف "الحلوف" بتضحيات الأبطال و ابقينا واقفين..احنا هوما الهواريين زعماء و امساطيش وين اروحو الشعوب بينا رحابين و لينا مقادرين ومهما نختالفو مع بعضانا ضد البراني واقفين..احنا هوما "الأكتوبوبرين" أول ثورة عربية ضد النظام و الحقرة و ...الفاسدين..أول من كسر حاجز الخوف من "السيستام المكشوف" و جاب حقو في الديمقراطية و جعل الأحزاب تنشط بلا خوف و في الميدان واقفين..احنا هوما المقاومين شعب ارفض الارهاب و ما خوفو موس ولا هبهاب و عشره سنين دم بلحساب ما اركع ما اغلق الباب بفضل الشباب الواقفين..احنا هوما "الأمدرمانيين" على جال كلمة تع بخس في حق شهادئنا قالوها الفتانين من المصريين هبوا شباب و شياب بالعلام لخضر و دارو جسر جوي للسودان خلى العالم و العلماء من حايريين أول مرة في تاريخ الرياضة دولة تسخر امكانيات بالملايين و تبعث بشبابها -عفوا بأبطالها- الكل يد وحدة ضربت فم المعتدي كستلو السنين و جابو الفوز و الانتصار و جاو واقفين..احنا هوما الواعيين ..الكل يتكلم على ربيع عربي خسر و كسر و اخلا الأمم و كي وصل عدنا صابنا فايتينو بعشرات السنين واعياو العديان واصحاب الفتن ينفخو فينا و صابونا ليهم كاشفين و على مرادهم الخبيث فايقين و واقفين..
احنا هوما الجزايريين ما نعضوش اليد الي تتمد لينا و ما ننكروش خير أبطالنا و تاريخ المجاهدين..و لما الواجب ينادينا و البلاد تحتاج لينا الي يكون معارض يرجع مساند و للجزائر الكل نكونو واقفين ..و مـــازالـــــــنـــــــا واقـــــفــــــيــــــــــن..