الــجــيــل "الــمــجـلـــجــــل" ..كـــيــمــا ادّير مـــعـــاه تـــحـصــل..
..واحد يقول ادراهم البترول.. علاش نتعبو و الخير عدنا عمرو ما يزول..نورمالمو ناكلو "بالفرشيطة" و في مكان الخبز ناكلو "الدّيول" .. ولاخر يهدر على الجنرالات نحاسبوهم بلّي حيّ بلّي مات وهو في حياتو ما شاف "كابران" و الاّ على العسكريّة فات..بلا دليل و لا بيّنات من غير كلمات رافدهم من عند " السّيدة جوليات" و يعاود فيهم كي ..."البيروكي بوزغبات" بلا ما يعرف المصدر والاّ منين جات .. و هذاك ينتقد و يشكّك في التّاريخ و يصرّح بلّي الثورة التحريرية كذب و "اسليخ" و المليون و نص ماشي جزايريين بلاك جاو من "المرّيخ" ..ما يفرقّش ما بين "القدّيد و الفسيخ" و كي تهدر معاه يردّك انت الجاهل و هو "الشّيخ"..والّي كمّل اعليها و اخلاها "البزّ" اللّي كانت "مكوشيا" في حجر يمّاها.. أيّامات الدّم و العشريّة الّي فوّتناها و يرجع يجادل فيك على حاجة انت مولاها .. و يغالب فيك و مئاسيك في رمشة امحاها..
عاد كل طير يغنّي بغناه.. وكلّ واحد يسعى لمرضاه ..و منطق "الأنا" طغى على لفواه.. حتّى المرض استعصى و غاب ادواه..و عاد الباطل راكب و الحقّ يجري موراه ..ياك اللّحم اذا فاح عندو مولاه ..
