الــوقــت الــمــكــشــوف..الــبــاطــل يــمــشــي و الــحــقّ يــشـــوف
استرنا يا ستّار من هذا الوقت المكشوف، اخلاصو فيه الخصايل وابقاو غير "الهدّارة"..اقساحو فيه القلوب و فرغو كيف "الجوف"،و الناس خلاّت الرّبح و تبّعت الخسارة..اللّي كان بكري مستور عاد اليوم مكشوف، و اللّي كان نيّة ارجع مولى حيلة و ازكارة..بدّلنا الحرير النّاعم بخشونية الصّوف، و تبدّل ذوق العسل على لسانا عاد مرارة..كي عادت البنت عريانة في الطريق اجّول و اطوف، و الرّاجل في البيت حاجب و متّحزّم "بفولارة"..و عاد اللّي قرا و اشقا واتمكّن من الحروف، ولّى "خمّاس" يرعى عند الجاهل "بوشكارة"..و عادت مدنّا معمّرة بأصحاب الموس و "المولوتوف"، و ضرّابين السّيف "ولاد الحيضة" كامل حقّارة..ما يحشمو ما يعرفو من الله خوف، واللّي طاح في يدّهم يا حوجي راح اخسارة..ما بانو بني ادم ما بانو من سلالة "الحلّوف" منين هاذ القوم ما تدري عنهم اصل والاّ اخبارة..ما تعرف الصحّ و بعينيك يخونك الشّوف، و تحسب روحك اعميت و خسّاتك "نضّارة"..اتخلّطت القرنينة مع عسلوج "الخرشوف"، و اتقلثت التمهبيل مع الجياح و الزّكارة"..و عاد حليبنا يجي في "صاشي" مغلوف، ما تعرفو لا تع بقرة ما تفرّقو من تع "الحمارة"..
